په کونړ کې د طبيعي پېښو پر وړاندې د مبارزې اداره د ژمي په راتلو سره اندېښمنه ده، چې د واورو ورښت به بيا د ځينو غره ييزو سيمو لارې بندې او خلکو ته ګڼې ستونزې رامنځته کړي.
په کونړ کې د طبيعي پېښو پر وړاندې د مبارزې اداره د ژمي په راتلو سره اندېښمنه ده، چې د واورو ورښت به بيا د ځينو غره ييزو سيمو لارې بندې او خلکو ته ګڼې ستونزې رامنځته کړي.
د دغې ادارې مشر غلام علي ثبات کليد ته په يوه ځانګړې مرکه کې وويل، چې د ولايت د څوارلسو ولسواليو اکثره يې دې ګواښ سره مخ دي.
هغه د دې ترڅنګ، چې احتمالي زيانمنو سره مرستو ته تر زيان وړاندې د اسانتياوو له نشتوالي شکايت کاوه، ويل يې، که مرستې په لاس هم ورشي ترهغې يې خلکو ته نه شي رسولاى، چې د واورينو لارو د پاکونې وسايل ونه لري.
ثبات په همدې دليل غوښتنه لري، چې مرکزي دولت او نورې مرستندويې ادارې دې ورسره ترهر څه مخکې د لار پاکونکو وسايلو مرسته وکړي څو په وينايې، وکړاى شي لاسته ورتلونکي خوراکي او نور توکي د اړتيا پرمهال لرو پرتو غره ييزو سيمو ته ورسوي.
د طبيعي پېښو پر وړاندې د دې ادارې مشر کليد ته وويل، چې خپلې غوښتنې يې مرکزي دولت سره شريکې کړي، خو لا يې کوم ځواب نه دى ترلاسه کړى.
کونړ تر نورستان وروسته د هېواد ختيځ کې دويم ولايت دى، چې ډېرې غره ييزې سيمې يې تګ،راتګ ته اسانې لارې نه لري او په ژمي کې د واورو ورښت او اوړي کې د همدې واورو له ويلي کېدو سېلاب شوې اوبه يې خلکو ته لويې ستونزې رامنځته کوي.
د ژمي په راتګ سره د نورستان والي هم خلکو سره د مرستو غوښتنه کړې وه، چې وېل کېږي لا يې چا غږ نه دى اوريدلى.
کلید ګروپ په ټویټر او فیسبوک کې وګورئ
