د ننګرهار په بټي کوټ ولسوالۍ کې تېره شپه پر يوې امنيتي پوستې وسله والو طالبانو بريد کړى، چې چارواکي يې يوازې پخلى کوي. بريد د باريک آب پله ته څېرمه د پوليسو پر پوستې شوى، چې د بټي کوټ ولسوال وايي
د ننګرهار په بټي کوټ ولسوالۍ کې تېره شپه پر يوې امنيتي پوستې وسله والو طالبانو بريد کړى، چې چارواکي يې يوازې پخلى کوي.
بريد د باريک آب پله ته څېرمه د پوليسو پر پوستې شوى، چې د بټي کوټ ولسوال وايي: رسنيو ته يې د نورو جزياتو د ورکولو اجازه نه لري.
د ننګرهار د امنيې قومندانۍ وياند سر څارمن حضرت محمد زمرى هم پرپوستې ډزې مني، خو وايي: په نورو جزياتو پسې يې سيمې ته يو پلاوى تللى او دوى لا پوره معلومات نه لري.
د وسله والو طالبانو وياند ذبيح الله مجاهد له ناڅرګند ځايه په ټليفون کليد ته وويل، چې پر باريک آب پوستې بريد دوى کړى او د ده په دعوه دوه دولتي سرتېري يې پکې وژلي.
بټي کوټ، چې د جلال اباد – تورخم پر لويه لاره پرته ولسوالي ده، وړمه ورځ په کې د پوليسو پر يوه موټر د سړک غاړې ماين چاودنه شوې وه، چې د يوه پوليس د وژل کېدو ترڅنګ پکې يو بل پوليس ټپي شوى هم و.
کلید ګروپ په ټویټر او فیسبوک کې وګورئ
