د تخار په خواجه غار ولسوالۍ کې افغان ځواكونه او وسله وال طالبان دواړه یو بل ته د مرګ ژوبلې اړولو دعوه کوي. د تخار ولایت امنیه قومندان مل پسوال شاه جهان نوري کلید ته وویل،
د تخار په خواجه غار ولسوالۍ کې افغان ځواكونه او وسله وال طالبان دواړه یو بل ته د مرګ ژوبلې اړولو دعوه کوي.
د تخار ولایت امنیه قومندان مل پسوال شاه جهان نوري کلید ته وویل، چې تېره ورځ د یاد ولایت په خواجه غار ولسوالۍ کې د عامه نظم پولیسو او وسله والو طالبانو ترمنڅ نښته رامنڅ ته شوې، چې د هغه په وینا، ۸ تنه وسله وال طالبان په کې وژل شوي دي.
نوري زیاته کړه، چې په وژل شویو کسانو کې یو تن بهرنى هم شامل دی، چې د هغه په خبره د تاجکستان تبعه دی.
د سرچينې د معلوماتو له مخې، نښتې څو ساعته دوام درلود او په پايله كې يې پولیسو ته ګڼ شمېر وسلې په لاس ورغلې دي.
نوموړي په دغه نښته کې د یوه افغان سرتيري د ټپي كېدو پخلى هم وكړ او زياته يې كړه، چې ټپي سرتېرى روغتون ته لیږدول شوی او روغتيايي حالت يې ښه دی.
بلخوا د وسلوالو طالبانو ویاند ذبیح الله مجاهد د ټیلفون له لارې کلید ته وویل، چې په یاده نښته کې یې ۴ تنه اربکيان وژلي او ۲ نور یې ټپيان کړي دي.
مجاهد خپل لوري ته هم د زیان اوښتل مني او زیاته وي، چې دوه ملګري يې وژل شوي دي.
خواجه غار د تخار ولایت نسبتاْ ناارامه ولسوالي شمېرل کیږي، چې ډېرې وختونه ورڅخه د نښتو رپوټونه ورکول کیږی.
کلید ګروپ په ټویټر او فیسبوک کې وګورئ
