ځايي چارواكي وايي، تېر مازيګر د پكتيا ولايت د شواك په ولسوالۍ كې د ملي اردو د عسكرو په رينجر موټر د سړك د غاړې بمي چاودنه شوې، چې له كبله يې د ملي اردو درېيو سرتېرو ته مرګ ژوبله اوښتي.
ځايي چارواكي وايي، تېر مازيګر د پكتيا ولايت د شواك په ولسوالۍ كې د ملي اردو د عسكرو په رينجر موټر د سړك د غاړې بمي چاودنه شوې، چې له كبله يې د ملي اردو درېيو سرتېرو ته مرګ ژوبله اوښتي.
د دوسوه دريم تندر قول اردو وياند ساعت ګل هوتك وايي: پېښه د يادې ولسوالۍ په سټو كنډو سيمه كې هغه مهال رامنځ ته شوه، چې د ملي اردو سرتيري په سيمه كې پر ګزمه بوخت وو.
د قول اردو وياند وايي، چې په پېښه كې د اردو دوه عسكر وژل شوي او يو بل يې ټپي دى.
د وسله والو طالبانو وياند ذبيح الله مجاهد رسنيو ته ويلي، چې د سړك د غاړې ماين د دوى د ملګرو له خوا ځاى پر ځاى شوى و، چې د چاودنې له كبله يې د ملي اردو سرتېرو ته زيات زيان اوښتى دى.
شواك د پكتيا او خوست تر منځ په غځېدلې لويه لاره پرته هغه ولسوالۍ ده، چې وخت ناوخت ترې د سړك د غاړې د بمي چاودنو او نښتو راپورونه وركول كېږي.
هېره دې نه وي، چې څه موده وړاندې د دې ولسوالۍ ولسوال علي اباد هم د سړك د غاړې په بمي چاودنه كې وژل شوى او مسؤليت يې وسله والو طالبانو په غاړه اخيستى و.
کلید ګروپ په ټویټر او فیسبوک کې وګورئ
