د ډېورنډ کرښې ته لنډ کونړ کې بيا ايتلافي او افغان ځواکونو د وسله والو طالبانو پرضد پوځي عمليات کړي، چې دواړه غاړې پکې يو بل ته د مرګ، ژوبلې دعوې کوي.
د ډېورنډ کرښې ته لنډ کونړ کې بيا ايتلافي او افغان ځواکونو د وسله والو طالبانو پرضد پوځي عمليات کړي، چې دواړه غاړې پکې يو بل ته د مرګ، ژوبلې دعوې کوي.
عمليات د سرکاڼو ولسوالۍ په ګجنګل سيمه کې له درېيو ورځو راهيسې شوي، چې د کونړ د والي سيدفضل الله وحيدي په وينا، پکې يوولس حکومت ضد وسله وال وژل شوي او دوه نور ټپيان دي.
د کونړ والي عمليات د ايتلافي ځواکونو، افغان ملي اردو او سرحدي او ملي پوليسو لخوا ترسره شوي ګڼي.
په ختيځ کې د سرحدي ځواکونو قومندان مل پاسوال امين الله امرخېل بيا کليد ته رد کړه، چې ګواکې په دې عملياتو کې سرحدي پوليسو هم برخه لرله.
همدلته ختيځ کې د ايتلافي ځواکونو مطبوعاتي اداره افغان ځواکونو سره په دې عملياتو کې د خپلو يوولسو وسله والو مخالفينو د وژلو ترڅنګ د هغوى د وسلو او مهماتو د لاسته راوړلو دعوه کوي.
بله خوا طالب وياند ذبيح الله مجاهد د عملياتو پخلى کوي، خو وايي د څلورو ملګرو د وژل کېدو ترڅنګ يې پکې درې نور ملګري ټپيان شوي او عمليات کوونکې غاړې ته هم په ناڅرګنده کچه دروند ځاني زيان اوښتى.
د تېرې يکشنبې پر شپه د کونړ د بلې سرحدي ولسوالۍ ناړۍ پر دوو غره ييزو سيمو، کهي او ديسکور ايتلافي ځواکونو بمبار کړى و، چې پکې تر پينځه وېشتو پورې د ډيورنډ له هغې غاړې د راغلو پاکستاني وسله والو د وژنې دعوه کېده.
دا چې په تازه عملياتو کې وژل شوي وسله وال څوک دي؟ د کونړ والي وايي، غوڅ ځواب يې نه شي ويلاى، خو ګومان کوي چې دا به هم د پاکستان تر واک لاندې سيمو څخه راغلي حکومت ضد وسله وال وي.
طالب وياند بيا د والي خبره نه مني او وايي، چې داسې خبرې تبليغاتي بڼه لري.
کونړ، چې د هېواد ختيځ کې ترټولو ناامنه ولايت ګڼل کېږي، پکې د دولت پلوو ځواکونو او وسله والو مخالفينو ترمنځه يې ډېرې داسې پېښې کېږي، چې اکثره او په ځانګړي ډول د دولتي زيان پرمهال يې ځايي چارواکي رسنيو ته معلومات نه ورکوي.
کلید ګروپ په ټویټر او فیسبوک کې وګورئ
