ځايې چارواكي وايي، چې تېره ورځ يې د پكتيا ولايت په مركز ګردېز كې د امنيتي ځواكونو له خوا د غلو يوه ډله نيول شوې ده. د پكتيا امنيه قومندان جنرال عبدالغفار ساپى وايي، چې د غلو دا څلور كسيزه ډله يې د ګردېز ښا
ځايې چارواكي وايي، چې تېره ورځ يې د پكتيا ولايت په مركز ګردېز كې د امنيتي ځواكونو له خوا د غلو يوه ډله نيول شوې ده.
د پكتيا امنيه قومندان جنرال عبدالغفار ساپى وايي، چې د غلو دا څلور كسيزه ډله يې د ګردېز ښار په زړه كې نيولي.
نوموړى وايي، چې له غلو سره يې وړې وسلې، چرس او د بېلابېلو هېوادونو پيسې هم نيولې دي.
جنرال ساپى زياتوي، چې دې غلو د پلازمېنې كابل په موسوي سيمه كې غلا كړې وه، چې د امنيتي ځواكونو له څارنې ورسته د ګردېز په ښار كې له يو سرف ډوله موټر سره ونيول شول.
امنيه قومندان زياتوي، چې په نيول شويو غلو كې درې تنه د پكتيا او پاتې يو يې د لوګر ولايت اوسيدونكى دى.
چارواكي وايي، چې نيول شوي كسان په زياتو شوكو او غلاوو كې په لاس لرلو تورن دي.
بلخوا د سيمې اوسېدونكي اندېښنه لري، چې په دې ورستيو كې د پكتيا په ولايت كې د موټرو تښتونكي او نورې شوكمارې ډلې راپيدا شوې دي.
پاتې دې نه وي، چې له دې وړاندې هم پكتيا ولايت كې د امنيتي ځواكونو له خوا څو، څو ځلې د غلو ډلې نيول شوې دي، نږدې دوه مياشتې وړاندې د دې ولايت په سيدكرم ولسوالۍ كې هم د غلو يوه ډله نيول شوې وه.
کلید ګروپ په ټویټر او فیسبوک کې وګورئ
