د لوګر د ولايتي شورا غړى عبدالله احمدزى نن سهار له خپل ساتونکي او موټر چلوونکي سره يوځاى د ناپېژاندو وسله والو له خوا ووژل شو. احمدزى نن سهار شاوخوا نهه بجې، له خپل کوره چې
د لوګر د ولايتي شورا غړى عبدالله احمدزى نن سهار له خپل ساتونکي او موټر چلوونکي سره يوځاى د ناپېژاندو وسله والو له خوا ووژل شو.
احمدزى نن سهار شاوخوا نهه بجې، له خپل کوره چې د سر سنګ په سيمه کې دى، ولايتي شورا ته پر لاره و، چې موټر يې د وسله والو تر بريد لاندې راغى.
د لوگر د والي وياند دين محمد دروېش كليد ته وويل، چې احمدزى نن سهار هغه مهال د وسله والو تر بريد لاندى راغى، چې له كوره دفتر ته پر لاره و.
د روېش زياته كړه، چې په دغه پېښه كې د لوگر د ولايتي شوراى غړى عبدالله احمدزى، د هغه موټر چلونكى او يو ساتونكى يې وژل شوي او يو بل ساتونكى يې ټپي شوى دى.
تر اوسه لا د دغه بريد مسؤليت، کومې وسله والې ډلې پر غاړه نه دى اخيستى.
عبدالله احمدزى، چې په تېره دوره کې د لوګر د ولايتي شورا رئيس هم پاتې شوى و، په دويم ځل ټاکنو کې بيا د خلکو له خوا د دغې شورا د غړي په توګه غوره شو.
کلید ګروپ په ټویټر او فیسبوک کې وګورئ
