كورنيو چارو وزارت د لوى اختر د رارسېدو په وياړ په ټول هېواد كې د ځانګړو امنيتي تدابيرو د نيولو او د پوليسو د لومړۍ درجې احضاراتو څخه خبر وركړ. د كورنيو چارو وزارت وياند زمري بشري د يكشنبې په ورځ كابل كې
كورنيو چارو وزارت د لوى اختر د رارسېدو په وياړ په ټول هېواد كې د ځانګړو امنيتي تدابيرو د نيولو او د پوليسو د لومړۍ درجې احضاراتو څخه خبر وركړ.
د كورنيو چارو وزارت وياند زمري بشري د يكشنبې په ورځ كابل كې خبري غونډې ته وويل، چې د لړم له څلريشتمې وروسته به د هېواد ټول امنيتي پوليس د ځانګړو امنيتي تدابيرو سربېره په لومړۍ درجه احضاراتو كې د اختر تر پايه د امنيت د ساتلو په هدف په خپلو دندو پاتې وي او همداراز د نورو امنيتي ارګانونو بشپړ ملاتړ او همغږي به له پوليسو سره هم وي.
د كورنيو چارو وزارت وياند زمري بشري له وسله والو مخالفينو وغوښتل، چې د لوى اختر په مناسبت دې له هر راز بريدونو څخه ډډه وكړي او په وينايې، هېوادوال دې هم د امنيت په ټينګښت كې له اړوندو امنيتي ارګانونوسره مرسته وكړي، چې ترڅو خلك خپل اسلامي او كلتوري مراسم په ډاډمنه فضاكې ترسره كړي.
د كورنيو چارو وزارت وياند زمري بشري په هېواد كې ورستيو امنيتي پېښو ته، چې په بېلابېلو ولايتونو كې خلكو ته مرګ ژوبله واړوله، د لاملونو په اړه يې ډېر څه ونه ويل، خو زياته يې كړه، چې څېړنې روانې دي.
د كورنيو چارو وزارت د چارواكو په وينا، د اختر په وياړ يې په كابل كې هم ځانګړي امنيتي تدابير نيولي دي، چې شاوخوا پنځلس زره امنيتي پوليس به يې د امنيت چارې پرمخ يوسي.
له بلې خوا د يكشنبې په ورځ په كندهار، ننګرهار او د هېواد په يو شمېر نورو سيمو كې د بيلابېلو بريدونو په ترڅ كې لسګونه كسانو ته مرګ ژوبله اوښتې ده.
کلید ګروپ په ټویټر او فیسبوک کې وګورئ
