د ډاياك پروګرام ته د شخصصي ۷ امنيتي كمپنيو مسؤلينو خپلې وسلې د امنيتي چارواكو له لارې وسپارلې. د پكتيا په مركز ګردېز كې ۱۴۷ مېله بېلابېلې هغه وسلې د ډاياك يا د بې وسلي كولو پروګرام ته وسپارل شوې
د ډاياك پروګرام ته د شخصصي ۷ امنيتي كمپنيو مسؤلينو خپلې وسلې د امنيتي چارواكو له لارې وسپارلې.
د پكتيا په مركز ګردېز كې ۱۴۷ مېله بېلابېلې هغه وسلې د ډاياك يا د بې وسلي كولو پروګرام ته وسپارل شوې، چې د شخصي امنيتي كمپنيو څخه راټولې شوې وې.
په سويل ختيځ زون كې د پنځه سوه پنځم سپين غر قومندانۍ قومندان ګل نبي احمدزى وايي، دغه ۱۴۷ ميله وسلې يي د شمشاد، فريد كوهي، خالد يوسف، شېر ګرديزي، اريوب، وايګل او فريد له كمپنيو څخه اخيستې دي، چې د سړك جوړونې د شركتونو او د بهرنيو ځواكونو پوځي اډو ته د اكمالاتي كاروانونو ساتنه يې كوله.
ځايې چارواكي وايي، چې په ور سپارل شويو وسلو كې روسي، چينايې او پاكستاني كلاشينكوفونه، پيكاوې او راكټ شامل دي، چې د پكتيا له اوو امنيتي كمپنيو څخه اخيستل شوې دي.
د پكتيا امنيه قومندان جنرال عبدالغفار ساپى وايي، دا مهال په دې ولايت كې يوه امنيتي كمپنۍ هم نه شته، چې ناقانونه وسلې دې ولري.
د دې وسلو سپارونكي وايي، چې وسلې يې په خپله خوښه امنيتي ځواكونو ته سپارلې دي.
د شخصي امنيتي كمپنيو بې وسلې كول، چې د جمهور رئيس كرزي د (۶۲) حكم له مخې تر سره كېږي د پكتيا ولايتي چارواكي يې په اړه وايي، چې په دې ولايت كې به د شلو ورځو په اوږدو كې د شخصي امنيتي كمپنيو وسلې په بشپړ ډول راټولې او د ډاياك پروګرام ته به يې وسپاري.
كه څه هم دا لومړى ځل نه دى، چې ناقانونه وسلې د ډاياك پروګرام ته سپارل كېږي، خو چارواكي وايي، چې له دې سره د ناقانونه وسلو د راټولولو لړۍ پاى ته په رسېدو ده.
پاتې دې نه وې، چې څو ورځې وړاندې هم په پكتيا ولايت كې يو شمېر هغه وسلې، چې د ځايې پخوانيو جهادي قومندانانو او د شخصي امنيتي كمپنيو څخه اخيستل شوې وې د ډاياك كمېسيون ته وسپارل شوې.
کلید ګروپ په ټویټر او فیسبوک کې وګورئ
