په ختيځ كې نن د دولسمو ټولګيو څه باندې پينځو زرو فارغينو څخه د لوړو زده کړو په نيت د کانکور ازموينه له نورو کلونو سره په دې توپېر واخيستل شوه، چې د ازموينې دوه نوې حوزې ورته پرانېستل شوې وې.
په ختيځ كې نن د دولسمو ټولګيو څه باندې پينځو زرو فارغينو څخه د لوړو زده کړو په نيت د کانکور ازموينه له نورو کلونو سره په دې توپېر واخيستل شوه، چې د ازموينې دوه نوې حوزې ورته پرانېستل شوې وې.پخوا د ننګرهار، کونړ، لغمان او نورستان ولايتونو دې فارغينو به په ننګرهار پوهنتون کې ازموينه ورکوله، خو سږ کال لغمان ځانته بېله او کونړ د ځان او نورستان ولايت لپاره د بېلې حوزې لرونکى دى.
په ننګرهار پوهنتون کې پيل شوې څلور ورځنۍ دا ازموينه، چې نن يې دويمه ورځ وه، د برخوالو اتو زرو له ډلې يې نن دوه زرو کسانو په ازموينه کې ګډون کړى و.
په کونړ کې بيادا ازموينه، چې د نورستان فارغينو هم برخه پکې اخېستې وه، نن پاى ته ورسېده او چارواکي وايي، چې په نن او پرون دواړو کې دوه زره او دوه تنو ګډون درلود.
د لغمان د مرکز مهترلام په مستورې لېسه کې بيادا ازموينه نن د دوه ورځو لپاره پيل شوه، چې د والي د وياند ګل رحمان همدرد په وينا، څه باندې نهه سوه کسانو پکې برخه درلوده.
د نننۍ ازموينې په اړه چارواکي وايي، چې د لوړو زده کړو وزارت يې څارنه کوله او له کومې ستونزې پرته ترسره شوې.
خو پر پرونۍ ازموينې ننګرهار کې نيوکه دا وه، چې د سهار د ټاکلي وخت خلاف د غرمې تر دولسو بجو وروسته پيل شوه.
پرکانکور ازموينې ډېر ځله ختيځ کې نيوکه دا شوې، چې ګواکې د دې سيمې برخوالو سره پکې د مور، ميرې چلن شوى، چې د لوړو زده کړو وزارت رد کړې.
خو دا ځل په ننګرهار کې د کانکور اخېستونکې کمېټې مشر کليد ته د دې دعوې پخلى وکړ او ويې ويل، يو شمېر ازموينه اخېستونکو په نورو ولايتونو کې خپل مسوليت سم نه دى ترسره کړى.
د کانکور سږنۍ ازموينه کې د چارواکو په وينا، شاوخوا يوسلو دېرش زره تنه برخه اخلي، چې شاوخوا پنځوس زره به يې په تعليمي ادارو کې جذب شي.
کلید ګروپ په ټویټر او فیسبوک کې وګورئ
