ګډو ځواكونو په غزني کې يو افغان ژورنالست رحمت الله نېكزاد په دې تور چې ګنې له طالبانو سره لاس لري نيولى.
پر ده تور دى چې ګنې ده ممکن د طالبانو له تبليغاتو سره مرسته کړې وي او يا دې د شنبې د ورځې د ولسي جرګې د انتخاباتو پر مهال د طالبانو د حملو فلم اخيستي وي.
خو د رحمت الله نېکزاد د کورنۍ غړو پر ده لګيدلي تورونه په کلکه ردوي.
د ناټو ځواكونو لخوا په خپره شوې اعلاميه کې د نيکزاد د نيونې يادونه شوې، خو د هغه د نيونې علتونو او پرې لګېدلو تورونو ته اشاره نه ده شوې.
د نيکزاد ملګرو هم دغه تورونه رد كړي ا ويلي يې دي، چې ده له دواړو غاړو سره اړيكې لرلې او د خپل خبر د كره والي لپاره به يې د دواړو لوريو نظرونه اخيستل.
نيکزاد سربېره پر دې، چې يو سيمه ييز خبريال دى، له ۲۰۰۷ کال راهيسي له اسوشېټېتد پرېس اژانس سره هم د يوه ازاد فوټو ژورناليست په توګه همکار دى.
نوموړي د يوې مودې لپاره له الجزيرې تلويزيون سره هم کار کړى دى.
کلید ګروپ په ټویټر او فیسبوک کې وګورئ
