د دولت د مخالفې وسله والې ډلې حزب اسلامي مشر انجنير حکمتيار د روغې جوړې خبرې يوه غولوونكې ډرامه وبلله او په هېواد کې يې د بهرنيو ځواکونو پر ضد پر جګړې ټينګار کړى دى.
د دولت د مخالفې وسله والې ډلې حزب اسلامي مشر انجنير حکمتيار د روغې جوړې خبرې يوه غولوونكې ډرامه وبلله او په هېواد کې يې د بهرنيو ځواکونو پر ضد پر جګړې ټينګار کړى دى.نوموړي دغه څرګندونې په هغې خبرپاڼه کې کړي، چې د نېکمرغه کوچني اختر په مناسبت خپره كړې ده .
د دغې خبر پاڼې يوه کاپي د ياد شوي ګوند د يوه غړي قريب الرحمن سعيد لخوا رسنيو ته ليږل شوې ده.
قريب الرحمن سعيد د حزب اسلامي د هغه پلاوي غړى و، چې څو مياشتې مخکې کابل ته له دولت سره د خبرو اترو په موخه راغلى و.
حکمتيار په ياده شوې خبرپاڼه کې ويلي، چې د سولې او روغې دولتي پلانونه د خلکو دغولولو لپاره جوړ شوي دي.
هغه د حل يواځينۍ لاره په هېواد کې د مېشتو بهرنيو ځواکونو پر ضد د جګړې تر هغه وخت پورې ادامه وبلله، ترڅو دغه ځواکونه له افغانستان څخه ووځي.
نوموړي د سولې له خبرو اترو سره په داسې حال کې خپل مخالفت ښودلى، چې جمهور رئيس کرزي له وسله والو مخالفينو سره د سولې د خبرو لپاره د سولې د عالي شورا د جوړولو اعلان کړى دى.
حکومت وايي، چې د دغې شورا د غړو لېست، چې کېداى شي ٥٠ يا ٦٠ تنه وي جوړ شوى او له اختره وروسته به يې اعلان کړي.
کلید ګروپ په ټویټر او فیسبوک کې وګورئ
