د نيمې شپې چاپې خلکو ته د روسانو د مهال نيونې وريادوي

افغان جمهور رئيس  حامد کرزي ومنله، چې له عدلي تعقيب نه يې د خپل يوه نژدې همکار د ژغورلو لپاره مداخله کړې وه. هغه د اې بي سي امريکايي ټلوېزيون “دې اوونۍ” پروگرام ته وويل

افغان جمهور رئيس  حامد کرزي ومنله، چې له عدلي تعقيب نه يې د خپل يوه نژدې همکار د ژغورلو لپاره مداخله کړې وه.

هغۀ د اې بي سي امريکايي ټلوېزيون “دې اوونۍ” پروگرام ته وويل ضيا صالحي يې ځکه له بند څخه وژغوره، چې د افغانستان د قوانينو خلاف د شپې په تياره کې نيول شوى و.

د امنيت شورا دغه غړى د بډو په تور د لوى څارنوال په حکم تېره اوونۍ ونيول شو، خو د جمهور رئيس  تر کلک غبرگون وروسته خوشې شو.

کرزي وويل، د بهرنيو په ملاتړ د مخ پټو ټوپکوالو دغسې د نيمې شپې چاپې خلکو ته د روسانو د مهال نيونې وريادوي او ډاروي يې.

خو ژمنه يې وکړه، چې عدلي مقامات به پرېږدي، چې پر صالحي د فساد تورونه وپلټي.

کرزي دغه راز تائيد کړه، چې تر اعلان شوې نېټې وروسته به په خپل هېواد کې خصوصي امنيتي شرکتونه فعاليت ته پرېنږدي.