وسلوالو طالبانو د هلمند د ګرېشک په ولسوالۍ کې د سړک جوړونې د شرکت پر امنيتي کسانو بريد کې ٣٠ ساتونکي وژلي، ١٩ يې ټپيان کړي او د هغوى ٣١ پوستې يې له منځه وړې دي.
وسلوالو طالبانو د هلمند د ګرېشک په ولسوالۍ کې د سړک جوړونې د شرکت پر امنيتي کسانو بريد کې ٣٠ ساتونکي وژلي، ١٩ يې ټپيان کړي او د هغوى ٣١ پوستې يې له منځه وړې دي.دا څرګندونې د هلمند د امنيه قوماندانۍ د امنيت امر سمونوال کمال الدين رسنيو ته وکړې او ويې ويل، چې دا بريد وړمه ورځ د ګرېشک د ميرمنداب په سيمه کې رامنځته شوى دى.
د نوموړي په وينا، طالبانو د ياد شوي شرکت د ٧ امنيتي پوستو قوماندانان له يوه اندازه وسلو او يو شمېر موټرو سره نيولي او د شرکت ګڼ شمېر موټر يې سوځولي دي .
د ده په وينا، د شرکت امنيتي کسانو ته دا مرګ ژوبله د يوې داخلي توطيې له لارې اړول شوې ده .
نوموړي وويل، چې وسلوالو طالبانو دغه بريد د دې شرکت له هغو سلو ساتونکيو سره په همغږۍ تر سره کړى، چې په دې وروستيو کې نوي په دندو ګومارل شوي وو.
د هلمند د امنيه قوماندانۍ د امنيت امر وايي، چې د يادو ټپيانو يو شمېر يې په ګرېشک کې په دولتي روغتون او يو شمېر يې په هلمند کې د مېشتو بهرنيو ځواکونو په اډه کې تر درملنې لاندې دي.
د دې شرکت يو کارکوونکى محمد طاهر وايي، چې شاوخوا دوه زره وسلوالو طالبانو د دې شرکت پر امنيتي پوستو بريد وکړ او ٢٥ ساتونکي په کې ووژل شول .
خو د امنيه قوماندانۍ د امنيت امر وايي، چې دومره ډېرو طالبانو په دې بريد کې ونډه نه لرله .
کلید ګروپ په ټویټر او فیسبوک کې وګورئ
