په ننګرهار کې د ناټو ځواکونو له خوا د دوو کسانو د وژلو په غبرګون د سره رود ولسوالۍ سلګونو اوسېدونکيو لاريون پيل کړى او د جلال اباد کابل لويه لاره يې د ترافيکو پر مخ وتړله.
په ننګرهار کې د ناټو ځواکونو له خوا د دوو کسانو د وژلو په غبرګون د سره رود ولسوالۍ سلګونو اوسېدونکيو لاريون پيل کړى او د جلال اباد کابل لويه لاره يې د ترافيکو پر مخ وتړله.د دې ولايت د امنيه قوماندانۍ وياند سمونوال عبدالغفور رسنيو ته وويل، چې ناټو ځواکونو تېره شپه د سره رود ولسوالۍ اړوند د سرخاب پله ته څېرمه د ظلم اباد په کلي کې عمليات ترسره کړي دي.
هغه زياته کړه، چې يادو شويو ځواکونو د دې عملياتو په ترڅ کې دوه ملکي وګړي، چې کروندګر وو، وژلي، دوه کروندګر او دوه مزدوران يې له ځان سره وړي دي.
سمونوال غفور وايي، چې ناټو ځواکونو د دې عملياتو په اړه له پوليسو سره هېڅ مشوره نه وه کړې او په خپل سر يې ترسره کړي دي.
د دغې پېښې په غبرګون کې د سره رود ولسوالۍ سلګونو اوسېدونکيو نن سهار په نهو بجو لاريون پيل کړ او د کابل جلال اباد لويه لاره يې د سرخاب پله په سيمه کې بنده کړه.
د يادونې وړ ده، چې څو مياشتې مخکې امريکايي ځواکونو يادې شوې سيمې ته څېرمه د نظراباد په کلي کې د ولسي جرګې د يوې وکيلې صفيه صديقي د خپلوانو پر کور هم عمليات ترسره کړى وو او يو شمېر کسانو ته يې مرګ ژوبله اړولې وه.
کلید ګروپ په ټویټر او فیسبوک کې وګورئ
