د كندهار پر هوايي ډګر د وسلوالو مخالفينو په بريد كې، شپږ بريد كوونكي ووژل شول او دوه ملكي وګړي او يو د ايساف سرتېرى ټپيان شول.
د كندهار پر هوايي ډګر د وسلوالو مخالفينو په بريد كې، شپږ بريد كوونكي ووژل شول او دوه ملكي وګړي او يو د ايساف سرتېرى ټپيان شول.
د كندهار د هوايي ډګر قوماندان جنرال رازق شېرزي رسنيو ته وويل، چې د نن د غرمې په ۳۰:۱۲بجو له يوه نامعلوم ځاى څخه پر ميدان درې توغندي وتوغول شول.
هغه زياته كړه، چې پر ډګر د راكټونو لګېدو مرګ ژوبله نه درلوده، خو د اوښتي زيان په اړه يې څه ونه ويل.
خو د كندهار ولايت مطبوعاتي مسؤل زلمي ايوبي رسنيو ته وويل، چې وسلوالو طالبانو د هوايي ډګر له شمالي وره څخه ډګر ته د ننوتو هوډ درلود، چې د پوليسو له غبرګون سره مخ شول.
نوموړي زياته كړه، چې په دې نښته كې د ايساف ځواكونو په مرسته، شپږ بريد كوونكي ووژل شول، او دوه ملكي وګړي له يو ايساف سرتېري سره ټپيان شول.
د ايوبي د څرګندونو پربنسټ، دوو وژل شويو مخالفينو ځانمرګي واسكټونه درلودل او پاتې نورو سره كلاشينكوفونه وو.
خو طالب وياند قاري يوسف احمدي وايي، چې څو ځانمرګي كسان د كندهار هوايي ډګر ته ننوتلي دي.
د كندهار پر هوايي ډګر په داسې حال كې د مخالفينو له خوا بريد كېږي، چې پرون د كندهار د ډنډ ولسوال، له يوه ځانمرګي بريد څخه روغ ووت؛ خو څلور ملكي وګړي په دې پېښه كې ټپيان شول.
کلید ګروپ په ټویټر او فیسبوک کې وګورئ
