افغان حکومت د سولې د ملي مشورتي جرګې له پرېکړو وروسته هڅې پيل کړې، چې د ملګرو ملتو امنيت شورا قانع کړي، چې له خپل تور لېسته د لسو وسله والو طالبانو نومونه وباسي، خو دې شورا يوازې د پنځو کسانو نومونه ايستلي دي.
د امنيت شورا هغې کمېټې، چې د طالبانو او القاعده پرضد د بنديزونو څارنه کوي، وويل، هغه کسان، چې نومونه يې له تور لېسته اېستل شوي تر ۲۰۰۱ پورې يې د طالبانو د رژيم لپاره کار کاوه .
د دې کمېټې په وينا په دغو پنځو کسانو کې د عبدالحکيم مجاهد (چې په نيويارک کې د طالبانو استازى و)، محمد اورنګ (د کانونو پخواني مرستيال وزير)،، عبدالسلام ضعيف (په پاکستان کې د طالبانو سفير)،عبدالستار پکتين (چې په بهرنيوچارو وزارت کې يې کار کاوه او يوه موده د عامې روغتيا وزارت مرستيال و) او دوه وژل شوي طالبان لکه عبدالصمد خاکسار او د باميانو پخوانى والي محمداسلام محمدي شامل دي.
پر دې اساس امنيت شورا يوازې درې پخواني طالب چارواکي له تور لېسته اېستلي، چې هغه هم په کابل کې اوسي او د څارونکو په وينا د کرزي د سولې او پخلاينې له بهير سره ډېره مرسته نه شي کولي.
کلید ګروپ په ټویټر او فیسبوک کې وګورئ
