د ننګرهار له شېرزادو ولسوالۍ څخه رپوټونه وايي، چې پرون مازېګر ناوخته په دې سيمه کې د وسله والو طالبانو او حزب اسلامي وسله والې ډلې ترمنځ جګړه شوې او څو تنو ته پکې مرګ، ژوبله اوښتې.
د ننګرهار له شېرزادو ولسوالۍ څخه رپوټونه وايي، چې پرون مازېګر ناوخته په دې سيمه کې د وسله والو طالبانو او حزب اسلامي وسله والې ډلې ترمنځ جګړه شوې او څو تنو ته پکې مرګ، ژوبله اوښتې.
د شېرزادو ولسوال حاجي عبدالله کليد ته وويل، چې د ولسوالۍ په توتو سيمه کې له دې جګړې خبردى، خو د مرګ،ژوبلې په اړه معلومات نه لري.
د ننګرهار د امنيې قومندانۍ وياند سمونوال عبدالغفور هم کليد سره په خبرو كې د وسله والو مخالفينو خپلمنځۍ جګړه ومنله، خو ويې ويل، جګړه په توتو کې نه بلکې د حصارک او شېرزادو ولسواليو ترمنځ د پټلو په نامه سيمه کې شوې.
دى وايي په يوه راپور کې ورته د يوه وسله وال د وژل کېدو او دوو د ټپي کېدو او بل کې يوازې د يوه تن د ټپي کېدو ويل شوي، خو نه پوهېږي، چې دا زيان به د کومې غاړې وي.
د وسله والو طالبانو وياند ذبيح الله مجاهد بيا له ناڅرګند ځايه په ټليفون کليد ته د دې جګړې خبره ردکړه او ويې ويل دې لپاره، چې دوى او حزب اسلامي دواړه د دولت پرضد دي نو کله به هم سره ونه جنګيږي.
په دې اړه د حزب اسلامي وسله والې ډلې په نظراخېستو کې پاتې راغلو خو بايد وويل شي، چې د شېرزادو ولسوال په دې ولسوالۍ کې د يادو دواړو ډلو د شتون پخلى كړى دى.
شېرزادو ولسوالي، چې د ننګرهار يو له تر ټولو نا امنو ولسواليو دى،دا لومړى ځل دى، چې د دولت د مخالفنيو د خپلمنځۍ جګړې خبر ترې راځي
کلید ګروپ په ټویټر او فیسبوک کې وګورئ
