تامین امنیت، سکتور خصوصی، به تصدی ملی  نظم عامه واگزار می‌گردد

به همین منظور قراراست به اساس قرارداد دوجانبه‌ی امنیتی با مراکز تحصیلی خصوصی، مسوولیت تامین امنیت پوهنتون‌ها به تصدی ملی نظم عامه سپرده شود.

ضیاء ودان؛ مسوول مطبوعاتی ریاست عمومی تصدی ملی  نظم عامه در صحبت با کلید می‌گوید، قرار است مسوولیت تامین امنیت همه نهادهای خصوصی  به ‌شمول پوهنتون‌ها به این اداره سپرده شود.

وی می‌گوید، بعد از سروی از نهادهای تحصیلی به اساس نیاز به  پوهنتون‌ها محافظ تعیین خواهد شد.

به گفته‌ی وی، هزینه‌ی این محافظین از سوی اداره پوهنتون‌ها  اعطاء می‌شود.

در همین حال وزارت تحصیلات عالی میگوید این تصمیم به منظورجلوگیری از حملات احتمالی بالای پوهنتون ها اتخاذ شده است.

حنیف فرزان؛ معاون سخنگوی وزارت تحصیلات عالی درصحبت با کلید واگذاری تامین امنیت پوهنتون ها به ریاست عمومی تصدی ملی  نظم عامه را گام موثر خوانده می‌گوید، از هر اقدامی که منجر به حفظ جان محصلین و متعلمین گردد استقبال می‌کند.

به گفته‌ی وی، هنوز چه‌گونه‌گی تامین امنیت پوهنتون‌ها از سوی این اداره مشخص نشده‌است.

اما اتحادیه پوهنتون‌های خصوصی، تامین امنیت مراکز تعلیمی و تحصیلی را جز مکلفیت‌های حکومت دانسته می‌گوید، به اساس قانون تامین امنیت شهروندان از وظایف حکومت می‌باشد.

محمد شفیق علوی؛ مشاور حقوقی اتحادیه پوهنتون‌های خصوصی کشور، در صحبت با کلید می‌گوید، چه‌گونه‌گی تامین امنیت پوهنتون‌ها و پرداخت هزینه‌های مالی باید مطابق به طرزالعمل پوهنتون‌ها صورت گیرد.

نیروهای تصدی ملی محافظت عامه از تشکیلات نظامی بوده که در بخش تامین امنیت برنامه‌های توسعوی دولت افغانستان، برنامه‌های بخش خصوصی، تامین امنیت پروژه‌های نهادهای بین‌المللی و تامین امنیت کاروان تدارکات ناتو فعالیت می‌کنند.