عبدالله بر حل مشکل پاسپورت‌های شهروندان افغان در عربستان تاکید می‌کند

رییس اجراییه حکومت وحدت ملی، از رفع مشکل توزیع پاسپورت‌های افغانی برای  شهروندان کشور در عربستان سعودی خبر می‌دهد.
عبدالله عبدالله که به تازگی از عربستان سعودی به کشور برگشته است، امروز در نشست خبری در کابل، گفت: “مشکل توزیع پاسپورت برای شهروندان افغان در عربستان سعودی در پی گفتگو های که با مقام‌های ارشد سعودی از جمله با پادشاه این کشور داشت، حل شده است.
رییس اجراییه حکومت وحدت ملی، می‌گوید: “رقم شهروندان افغان که دارای پاسپورت‌های پاکستانی‌اند، به ده‌ها هزار نفر می‌رسد.”
این در حالیست که دیروز کابینه حکومت وحدت ملی، به ریاست رییس جمهور اشرف غنی، به وزارت امور خارجه دستور داد که پروسه تغییر پاسپورت‌هاى پاکستانى  شهروندان کشور به پاسپورت‌هاى افغانى در حوزه خليج را سرعت ببخشد.
به گفتۀ ارگ ریاست جمهوری، دولت تغییر پاسپورت‌های مهاجران را بخش اولویت‌های خود می‌داند و به همین دلیل وزارت امور خارجه را موظف نمود، تا این پروسه را تسریع نموده، از چگونگی اجراآت و حساب‌دهی واضح آن به ریاست جمهوری گزارش دهد.
در حال حاضر، بسیاری از مهاجران افغان که در کشور های حوزه خلیج به خصوص در عربستان سعودی به سر می‌برند، دارای پاسپورت‌های پاکستانی اند.
این در حالیست که در جریان هفته گذشته، شماری از مهاجران افغان مقیم عربستان، با عبدالله عبدالله، رییس اجراییه، در ریاض دیدار کرده و خواهان تغییر پاسپورت‌های پاکستانی خود به پاسپورت‌های افغانی شده بودند.