وزارت صحت عامه اعلام کرده که کمپاین فرعی واکسین پولیو یا ضد فلج اطفال، امروز دوشنبه، در 324 ولسوالی کشور، آغاز گردید.
در یک اعلامیه این وزارت به نقل از فیروزالدین فیروز، وزیر صحت عامه آمده است، در جریان این کمپاین که تا 26م ماه میزان ادامه پیدا میکند، 8.5 میلیون کودک زیر سن پنج سال واکسین خواهند شد.
فیروز گفته است: “ما از وقفه طولانی در کمپاین واکسین پولیو که در بخشهای از کشور به وجود آمد نگران هستیم. از این بابت کودکان زیادی در معرض خطر ویروس پولیو قرار گرفته اند.”
وی، تطبیق این کمپاین را در بسیاری از ولسوالیها مهم دانسته و تاکید کرده است که در این دور، کودکان بازمانده، باید واکسین شوند.
در همین حال وزیر صحبت عامه از شهروندان کشور خواسته که با واکسیناتوران، در زمینه تطبیق این کمپاین همکاری کنند.
بر اساس معلومات وزارت صحت عامه، در جریان سال جاری میلادی، 16 قضیه مثبت پولیو در ولایتهای ارزگان، هلمند، کندهار و کنر، ثبت شده است.