شمار افراد دارای معلولیت در بلخ، از عدم توجه حکومت در زمینه‌ی اشتغال‌زایی برای معلولین دراین ولایت شکایت داشته و مسوولین محلی را به بی‌تفاوتی در این زمینه متهم می‌کنند.
آنان می‌گویند، مطابق قانون، سه درصد کارمندان ادارات دولتی باید افراد دارای معلولیت باشند اما این قانون از سوی اکثریت ادارات دولتی بلخ نقض می‌گردد.
تعدادی از افراد دارای معلولیت در روز جهانی همبسته‌گی معلولین به کلید می‌گویند، طی سال‌های اخیر با همکاری نهادهای ملی و بین‌المللی، برنامه‌های موثری برای بازتوانی افراد دارای معلولیت روی دست گرفته شده‌است.
آنان می‌گویند که با استفاده از این برنامه‌ها، تا اکنون ده‌ها تن از معلولین به سویه‌ی لیسانس و ماستر در ولایت بلخ تحصیل نموده‌اند.
این افراد می‌افزایند که با این توانایی‌ها کمتر معلولین یافت می‌شود که در ادارات دولتی بلخ صاحب شغل گردیده باشند.
با این حال نجیب الله کوهستانی آمر امور شهدا و معلولین ولایت بلخ می‌گوید، مسوولان محلی بلخ با همکاری اداره‌ی اصلاحات اداری برنامه‌ای را روی دست گرفته‌اند تا در آینده‌ی نزدیک معلولین بیشتر را در ولایت بلخ شامل کار نمایند.
مسوولان امور شهدا و معلولین ولایت بلخ می‌گویند که در این ولایت بیشتر از 4 هزارتن معلول جنگی وجود داشته که طی سال‌های اخیر در اثر جنگ و ناامنی‌ها اعضای بدن شان را از دست داده‌اند و ماهانه از سوی این اداره به مبلغ 2500 تا 5000 افغانی پول دریافت می‌کنند.
کلیدگروپ را در تویتر و فیس بوک دنبال کنید
