د راپورونو له مخې، په سوريې، افغانستان، عراق، يمن، ليبيا او يو شمېر نورو افريقايي هېوادونو کې د ترهګرو ډلو د فعاليت له کبله د ښځو او ماشومانو په ګډون ګڼ شمېر کډوال اروپايي هېوادونو ته ځي، خو ځينې يې مخکې له دې، چې خپل هدف ته ورسېږي، په اوبو کې ژوند له لاسه ورکوي.
د يونان د ساحلي ګارد د معلوماتو پر بنسټ، هره ورځ د يو شمېر هغو کډوالو جسدونه مومي، چې اروپا ته پر لاره يې خپل ژوند له لاسه ورکړی وي.
راپورونه وايي، د ترکيې او يونان ترمنځ اوره سرحد اوس هغه لاره ده، چې ډېری کډوال ترې اروپا ته د ځان رسولو لپاره ګټه اخلي.
د يونان ساحلي ګارد ويلي، يوازې په تېره يوه اونۍ کې يې د شاوخوا ۱۰۰ هغو کډوالو جسدونه موندلي، چې له ترهګرو ډلو د خونديتوب او په اروپا کې د ښه ژوند په هيله يې په لاره کې خپل ژوند له لاسه ورکړی دی.
ويل کېږي ترکيه ډېری وخت هڅه کوي کډوالو ته اجازه ورکړي، چې د دغه هېواد له پولو تېر شي او اروپا ته ځانونه ورسوي، چې په دې وروستيو کې د ترکيې دې پاليسۍ د اروپايي هېوادونو غوسه پارولې ده.
د يوناني رسنيو د راپورونو له مخې، شاوخوا ۳۶۴۰ کډوال ماشومان، چې په يونان کې مېشت دي، له سختو ستونزو له ډلې يې جنسي استفادې سره مخ دي.