هغه مسودې، چې امريکا او روسيې په سوريه كې د وروستي كېمياوي بريد د څېړنې په هدف چمتو كړې وې، د ملګرو ملتونو د امنيت شورا له لوري رد شوې.
د سې شنبې په ورځ رايه اچونه داسې مهال ترسره شوه، چې د واشنګنټن او مسکو تر نځ لفظې شخړې اوج ته ورسېدې او د لوېديځ لخوا امنيتي ګواښونه هم له دغه بريد وروسته راڅرګند شول.
لومړی روسيې د امريکا هغې مسودې ته د رد رايه ورکړه، چې د متحدو ايالتونو يوې ډلې ته واک ورکوي، ترڅو په سوريه کې د کېمياوي بريد په اړه څېړنه وکړي او دمشق په دغه بريد کې ملامت کړي.
د ملګرو ملتونو امنيت شورا ۱۲ غړو هېوادونو د امريکا چمتو شوې مسودې ته د تاييد رايې ورکړې، خو روسيې او بلوانيا ورته د رد رايې ورکړې او چين ممتنع رايه وكاروله.
دا دولسم ځل و، چې روسيې د سوريې په ملاتړ د خپل ويټو له حقه کار واخيست.
وروسته روسيې هم خپله مسوده رايې اچونې ته وړاندې کړه، چې د امنيت شورا د غړو هېوادونو له لوري رد شوه.
دغې مسودې ته يوازې شپږ مثبتې، اووه رد او دوه ممتنع رايې وركړل شوې.
د يوې مسودې د منلو لپاره د تاييد نهو رايو ته اړتيا ده، په داسې حال کې، چې د امنيت شورا د پنځو دايمي غړو له لوري بايد رد نه کړل شي.
د امريکا جمهور رئيس ډونالډ ټرمپ ژمنه کړې، چې د سوريې کېمياوي بريد ته به ډېر ژر غبرګون وښيي.
کلید ګروپ په ټویټر او فیسبوک کې وګورئ