جمهور رئيس محمد اشرف غني وايي، د روغتونونو د بدلون، د روغتيايي سيسټم د معياري کولو او د ډاکټرانو د سويې د تثبيت په برخه کې هر اخيستل شوى ګام په حقيقت کې د ميليونونو انسانانو ژغورل دي.
هغه پرون په ارګ كې د ډاکټرانو د نوم ليکنې الکترونيکي سيسټم د لومړي پړاو د پرانيستې مراسمو کې، چې د افغانستان د طبي شورا په نوښت جوړ شوی وو، ګډون او وينا وکړه.
جمهور رئيس غني وويل، چې د هېواد د روغتيايي خدمتونو معياري کول په ډاکټرانو او د دې برخې په کارکوونکو پورې اړه لري.
نوموړي د هېواد د روغتيايي بنسټونو پر غير سياسي کولو ټينګار وکړ او زياته يې كړه، چې خلك د پراخو اصلاحاتو غوښتونكي دي.
بلخوا د افغانستان د طبي شورا رئيسې نسرين اورياخېل وويل، د ډاکټرانو ثبتول دا اسانتياوې برابروي، چې د هغوى د شمېر، تحصيلاتو او تجربو د کچې په اړه معلومات ترلاسه کړي.
هغې زياته كړه، د ډاكټرانو نوم ليکنه په ملي او نړيواله کچه د هغوى اعتبار زياتوي.
کلید ګروپ په ټویټر او فیسبوک کې وګورئ