جمهور رئيس محمد اشرف غني تېر مازديګر په ارګ كې د حسين المسلم په مشرۍ د المپک اسيايي شورا پلاوي سره وکتل.
د جمهوري رياست مطبوعاتي دفتر وايي، چې دواړو لورو د همکاريو، د افغانستان د ورزش د ودې او پراختيا په اړه خبرې وکړې.
جمهور رئيس غني وويل، د افغانستان د المپک ملي کمېټې رياست ټاکنې ترسره کېږي او له دې پلاوي يې وغوښتل، چې د منل شوو قوانينو او طرزالعملونو پر بنسټ په دې برخه کې همکاري وکړي.
هغه ټينګار وکړ، چې په ولايتونو کې دې د فدراسيونونو ټاکنې هم د المپک د مقررو له مخې وشي.
وروسته د المپک اسيايي شورا د پلاوي رئيس حسين المسلم وويل، دوى چمتو دي، چې د قوانينو مطابق د رڼو ټاکنو په ترسره کولو کې د افغانستان د المپيک ملي کمېټې سره همکاري وکړي.
نوموړي زياته کړه، د المپيک اسيايي کمېټه به په درېيو مياشتو کې د افغانستان د المپيک ملي کمېټې رياست د ټاکنو ترسره کېدو په هدف د دغه هېواد د ورزش له برخې سره په همکارۍ لازم تيارى ونيسي او تطبيق به يې کړي.
د هغه په وينا، د المپيک اسيايي شورا به د جاکارتا اسيايي سياليو کې، چې راتلونكى كال ترسره کېږي، افغان لوبغاړو ته د حضور زمينه برابره کړي.
کلید ګروپ په ټویټر او فیسبوک کې وګورئ