د ملي يووالي حكومت اجرائيه رئيس عبدالله عبدالله د ملګرو ملتونو په عمومي اسمبلۍ کې په سيمه کې د تروريستانو د پټنځايونو د مسئلې پر حل ټينګار وکړ او ويې ويل، چې د دې ستونزې حل به افغانستان سولې او ثبات ته نږدې کړي.
نوموړي د دوشنبې په ورځ د ملګرو ملتونو عمومي اسمبلۍ ته د وينا په مهال زياته كړه، دوى باوري دي، چې په سيمه کې د تروريستانو د ملاتړو او د هغوى د پټنځايونو له منځه وړل او د دې مسئلې روښانول هغه څه دي، چې افغانان سولې او ثبات نه نږدې کوي.
عبدالله د هېواد امنيت تر نورو مسئلو لومړی وباله او ويې ويل، چې د ملګرو ملتونو له ټول توان څخه به د تروريزم له ټولو ډولونو سره د مبارزې په برخه كې پوره کار واخلي، ځکه د خلکو د ثبات او ارامۍ لپاره دا يوازينی تضمين دی.
اجرائيه رئيس زياته کړه، په تروريستانو کې ښه او بد نشته او بايد د ټولو تروريستي ډلو او فعاليتونو په وړاندې ګډه مبارزه وشي.
نوموړي څو ورځې وړاندې هم د امريکا له مرستيال جمهور رئيس سره د ترهګرو د پټنځايونو په اړه خبرې کړې وې او ويلي يې و، چې تراوسه پورې پاکستان کې د تروريستانو پټنځايونه يوه جدي ستونزه ده.
په ورته وخت کې د هېواد سياسي فعالان په دې باور دي، تر هغه چې پاکستان کې د تروريستانو پټنځايونه له منځه وړل شوي نه وي، افغانستان کې سوله نه شي راتلی او دننه په افغانستان کې به له تروريستانو سره جګړه روانه وي.