د فراه ولايتي شورا له سختو امنيتي ګواښونو سره د فراه ښار د مخ کېدو خبر ورکوي.
د فراه د ولايتي شورا رئيسه جميله اميني وايي، اوس مهال د ياد ولايت شيب کوه، پشت کوه، بالابلوک او پشت رود ولسواليو کې وسله وال طالبان پراخ شتون لري او له امنيتي ځواکونو سره پر جګړې بوخت دي.
نوموړې کليد ته وويل، پشت رود د فراه ښار مرکز ته نږدې ولسوالي ده او د دې ولسوالۍ د نوبهار، روقه، رج، ګرم توت او ګينه کان کلو ټولو اوسېدونکو د جګړو له کبله خپلې سيمې پرېښي او نورو ولايتونو ته کډوال شوي دي.
جميلې زياته کړه، په تېرو څو ورځو کې د امنيتي ځواکونو پنځه پوستې د وسله والو طالبانو له لوري سقوط شوې. د هغې په وينا، که مرکزي چارواکي فراه ته پاملرنه ونه کړي، دا ولايت به د تېر کال په څېر بيا د سقوط له ګواښ سره مخ شي.
د فراه د والي وياند ناصر مهري تاييدوي، چې په دې وروستيو کې د طالبانو بريدونه په ياد ولايت کې پراخ شوي او کله ناکله د امنيتي ځواکونو پر پوستو بريدونه کوي. د نوموړي په خبره، د ټولو امنيتي ځواکونو په همغږۍ تصفيوي عمليات پيل شوي او وسله والو طالبانو ته په کې درنه مرګ ژوبله اوښتې ده.
مهري زياتوي، اوس مهال د فراه امنيتي وضعيت د اندېښې وړ نه دی.
دا په داسې حال کې ده، چې تېره اونۍ طالبانو د دغه ولايت د پشت کوه ولسوالۍ کنيسک او تخت سنګ سيمو کې د امنيتي ځواکونو پر پوستو بريدونه وکړل، چې په پايله کې يې ۱۶ پوليس او دوه ملکي وګړي ووژل شول.
