د كورنيو چارو وزارت وايي، چې د كابل – كندهار لويې لارې په اوږدو كې تېره ورځ د امنيتي ځواكونو او وسله والو طالبانو ترمنځ نښته كې ۵۵ طالبانو ته مرګ ژوبله اوښتې او دوه تنه نور له چاودېدونكو توك ډك موټر سره نيول شوي دي.
دې وزارت نن كليد ته رالېږل شوې خبرپاڼه كې ويلي، چې د نښتې په مهال ۲۵ وسله وال طالبان وژل شوي او ۳۰ تنه نور ټپيان دي.
په ورته وخت كې د ميدان وردګ د امنيه قوماندانۍ وياند نقيب اميني كليد ته وويل، چې امنيتي ځواكونو له طالبانو څخه ۸ عرادې موټر سايكلونه، درې ميله كلاشينكوفونه، يو قبضه راكټ او يوه اندازه مهمات هم ترلاسه كړي دي.
هغه زياته كړه، وسله والو طالبانو غوښتل د ډله ييز بريد او ماينونو ښخولو په وسيله د كابل – كندهار لويه لار د ټرافيكو پر مخ وتړي، خو امنيتي ځواكونو يې دغه هدف ته د رسېدو مخنيوى وكړ او درنه مرګ ژوبله يې ور واړوله.
اميني وايي، چې په جګړه كې شپږ امنيتي سرتېري هم ټپيان شوي او د طالبانو په ډزو يو ملكي وګړى وژل شوى دى.
وسله والو طالبانو تراوسه په دې اړه رسنيو ته څه نه دي ويلي.
کلید ګروپ په ټویټر او فیسبوک کې وګورئ
