په کشمير کې د هندي سرتېرو او لاريون كوونكو ترمنځ نښتو کې ۱۲ تنه وژل شوي او يو شمېر نور ټپيان دي.
هندي چارواکي وايي، دغه ۱۲ وسله وال كسان په پلوامه او وهاړي سيمو کې له امنيتي سرتېرو سره د نښتو په مهال ووژل شول.
د هندي پوځي چارواکو په خبره، دوى د وسله والو يو مهم مشر د برهان واني ځاىناستى سبزر احمد له خپلو يو شمېر وسله والو سره وژلى دى.
برهان واني دوه کاله وړاندې له هندي ځواکونو سره په نښته کې ووژل شو.
دا مهال د هندي کشمير د مرکز سرينګر په ګډون په يو شمېر سيمو کې اعتراضونه روان دي او هندي پوليس هڅه کوي، چې اعتراض کوونکي تيت او پرک کړي.
په ورته وخت کې پاکستان په کشمير کې د هندي ځواکونو د عملياتو په اړه اندېښنه ښودلې ده.