د غزني ښار د لومړۍ امنيتي حوزې په مربوطاتو كې دوه ماين خښوونکي وژل شوي دي.
د غزني د امنيه قوماندانۍ له مطبوعاتي دفتره نن کليد ته په را استول شوې خبرپاڼه کې راغلي، پوليسو تېره شپه شاوخوا دولس بجې د غزني ښار شېخ اجل سيمه کې هغه دوه تنه ماين خښوونکي هدف ته تر رسېدو مخکې وژلي، چې غوښتل يې په ياده سيمه کې د سړک غاړې يو ماين ځاى پر ځاى کړي.
سرچينه وايي، دغه کسان د ماين ايښودلو په مهال سيمې ته څېرمه د پوليسو د امنيتي پوستې د پيره دار لخوا تشخيص او وروسته په ډزو وژل شوي دي.
د غزني امنيه قومانداني زياتوي، چې له دغو کسانو پاتې شوى ماين نن سهار د پوليسو له لوري شنډ شوى دى.
د دولت وسله والو مخالفينو تراوسه په دې اړه رسنيو ته څه نه دي ويلي.
