د هلمند ولايت نادعلي ولسوالۍ کې د افغان او بهرنيو ځواکونو هوايي بريدونو کې د وسله والو طالبانو د يوه ډلګي مشر په ګډون د يادې ډلې د سرې قطعې ۳۰ او په يوه بله پېښه كې درې نور وسله وال طالبان وژل شوي دي.
د هلمند ولايت د رسنيو دفتر څخه كليد ته رالېږل شوې خبرپاڼه كې راغلي، د طالبانو د سرې قطعې يوه ډله، چې مشري يې د کامران په نوم كس کوله، تازه له موسی کلا او کجکي ولسواليو څخه د نادعلي ولسوالۍ ته راغلې وه او پلان يې درلود، چې د لوى باغ سيمه کې پر امنيتي پوستو ډله ييز بريدونه وکړي.
د سرچينې په وينا، د کشفي او استخباراتي معلوماتو له مخې د دغې ډلې پلان شنډ او پرون ماسپښين شاوخوا دوه بجې د افغان او غوڅ ملاتړ ماموريت ځواکونو تر هوايي بريدونو لاندې راغله، چې په ترڅ كې يې د يادې قطعې ۳۰ وسله وال ووژل شول.
د يو بل خبر له مخې، د نادعلي ولسوالۍ په لوى باغ سيمه کې درې وسله وال طالبان، چې د ماينونو پر ايښودلو بوخت وو، د ۲۱۵ ميوند قول اردو د توپچي بريدونو په ترڅ کې ووژل شول، يو ميل کلاشينکوف، يو ميل د پيکا ماشيندار او يو ميل راکټ انداز يې هم په بشپړه توګه له منځه وړل شوي دي.
وسله والو طالبانو تراوسه په دې اړه رسنيو ته څه نه دي ويلي.