د ننګرهار ولايتي چارواکي وايي، اچين او هسکه مېنه کې د بېلابېلو هوايي بريدونو له كبله ۲۸ داعش وسله وال وژل شوي دي.
د ننګرهار د والي وياند عطاء الله خوګياڼي کليد ته وويل، تېره شپه د هسکې مېنې ولسوالۍ په ارغچ سيمه کې د داعش وسله والو پر يوه مهم مرکز هوايي بريد شوى، چې په ترڅ كې يې ۹ داعش وسله وال وژل شوي او لسګونه نور ټپيان دي.
خوګياڼي زياته كړه، د يوه بل هوايي بريد له كبله د اچين ولسوالۍ په مامند درې سيمه کې ۱۹ داعش وسله وال وژل شوي دي.
د نوموړي په خبره، د وژل شويو داعشيانو له ډلې ډېرى يې بهرنيان دي.
داعش وسله والو تراوسه په دې اړه رسنيو ته څه نه دي ويلي.
