د كاپيسا له نشه يي توكو سره د مبارزې مديريت پوليسو په دې ولايت كې ۳۲ كيلو ګرامه خام چرس نيولي دي.
د کاپيسا د امنيې قوماندانۍ وياند محمد ايوب يوسفزي كليد ته وويل، چې دغه چرس پرون ماسپښين د اول کوهستان په کنهه دې كلي كې له يوه مازدا ډوله موټر څخه ترلاسه شول.
د نوموړي په وينا، ياده اندازه چرس د چاكلېټو، بيسکټو او نورو خوراكي توكو په منځ كې ځاى پر ځاى شوي وو او د احمد شاه په نوم يو تن غوښتل له کاپيسا څخه يې کابل ته انتقال کړي.
د يادونې وړ ده، چې تېر کال د کاپيسا پوليسو نږدې اته سوه کيلو ګرامه بېلابېل نشه يي توکي او په تړاو يې له پنځوسو زيات كسان نيولي دي.