خبرهای داخلی

362
۱۱ قوس ۱۳۹۶
نویسنده: الیاس ابدالی

رئیس اجرایی: داعش در زمستان پیش‌رو در شمال افغانستان تار و مار می‌شود

رئیس اجرایی کشور در دیدار با صدراعظم تاجیکستان گفته است که گروه داعش در زمستان پیش‌رو در شمال افغانستان تار و مار خواهد شد.

عبدالله عبدالله روز جمعه در این دیدار گفت:” در حال حاضر ضربه‌ای‌که داعش در افغانستان دیده است، در هیچ گوشه‌ای از جهان متحمل نشده است.”

او تاکید کرد که سران داعش در افغانستان نابود شده‌‌اند.

رئیس اجرایی از قربانی‌ها و مبارزات نیروهای امنیتی و مردم افغانستان در مبارزه با هراس‌افگنی یاد کرد و گفت که تاجیکستان باید به کشورهایی‌که به مبارزۀ ما با هراس افگنی شک دارند، این موضوع را روشن سازد.

او اضافه کرد که افغانستان تشویش‌ها و نگرانی‌های تاجیکستان را درک می‌کند و با قاطعیت در برابر همۀ گروه‌های تروریستی به ویژه داعش مبارزه می‌کند.

در خبرنامه ریاست اجرایی آمده که قاهر رسول‌زاده صدراعظم تاجیکستان در این دیدار گفت که در مناسبات دو جانبۀ افغانستان و تاجیکستان به ویژه در عرصۀ تجارت پیشرفت‌‌های خوبی صورت گرفته است.

وی گفت که تاجیکستان در مجامع بین‌المللی از مواضع افغانستان حمایت می‌کند و تأمین صلح و ثبات در افغانستان را به مثابۀ تأمین صلح در تاجیکستان، منطقه و جهان می‌داند.

آقای رسول‌زاده، نگرانی‌های کشورش را از ناامنی‌ها در شمال افغانستان مطرح کرد و گفت که نا امنی بر دادوستد تجاری میان دو کشور تأثیر منفی می‌گذارد.

صدراعظم تاجیکستان، بر نقش سازمان شانگهای در بازسازی افغانستان و تأمین صلح و ثبات در کشور تأکید ورزید و گفت که تاجیکستان از عضویت کامل افغانستان در سازمان شانگهای حمایت می‌کند.

قاهر رسول‌زاده، بر پیگری و تعقیب پروژه‌های مشترک و بزرگ منطقه‌ای از جمله کاسا یک هزار تأکید کرد.

صدراعظم تاجیکستان بار دیگر تأکید کرد که تاجیکستان، تأمین صلح در افغانستان را به معنای امنیت و مصونیتِ کشورهای آسیای مرکزی محسوب می‌کند.

به اشتراک بگذاریدShare on FacebookShare on Google+Tweet about this on TwitterShare on LinkedIn

تا اکنون هیچ کامنت وجود ندارد

تا اکنون هیچ کامنت وجود ندارد